政情：公民講場：捉鼠公帑億元計 劉利群被轟昂貴

鼠患肆虐，各界鬧爆食環署滅鼠不力，早前仲話以每年滅鼠平均開支係一億五千萬元，只係捉到萬幾隻老鼠，即係要成幾千蚊捉一隻老鼠，尋日署長劉利群出席元朗區議會時，就有區議員兜口兜面話成本好貴喎。難怪啲區議員對劉利群咁唔客氣，事關班議員不停鬧低招滅鼠後，食環署試用新科技捉鼠，但零成效，依家新舊方法都唔掂，受罪嘅係市民，唔該劉利群戙高床板諗吓用乜嘢方法喇，否則嘥晒公帑又捉唔到老鼠，佢做呢份工，日子唔會好過。