政情：泛民擬提反修例 元朗區會拒批
泛民主派欲想將反修訂《逃犯條例》燒落區議會，再一次碰釘。元朗區議會尋日朝早開會，原本由多名泛民主派議員提出要就撤回《逃犯條例》進行討論，主席沈豪傑指有關議題應喺政治平台討論，認為區議會應處理民生問題，而唔係政治問題，為免區議員有唔同嘅立場而引起罵戰及爭拗，又指政府提出「暫緩」等同「撤回」修訂，議題冇討論空間，拒批喺尋日嘅議程討論。
泛民批評主席濫權
動議由身兼立法會議員嘅區議員鄺俊宇、麥業成同黃偉賢等五名區議員提出，佢哋批評主席濫用權力，質疑受中聯辦壓力取消議程，又認為政治與民生息息相關，區議會應該反映地區聲音。多名議員喺會上激烈討論，令會議一度暫停。
鄺俊宇等五名區議員事後發表聲明，指有關動議喺三個星期前已提交並獲區議會接納列入議程，但被區議會主席尋日突然強行抽起該項動議，即使在場嘅泛民區議員要求讀出聲明，也被拒絕，對此感到非常憤怒，又質疑反修例同六月十二日嘅大型集會已被禁止喺十八區區議會討論。