政情：鄧家彪再做老竇 細仔足秤又墜手

冀囝囝頂得住大風大浪

阿彪話囝囝尋日朝早十點幾喺公立醫院出世，依家個樣就似太太，至於大女就似佢，目前係一人似一個，但初生嬰兒個樣都未定，遲啲應該仲會變嘅，囝囝依家仲未改名，但打算同囡囡個名一樣，都係改單字，囡囡變成家姐，都已經抱過細佬嘞！

阿彪又話自覺好幸運，相隔咁多年再做爸爸，太太年紀唔係特別年輕，但生產過程好順利，最緊要就係母子平安吖嘛，又講起太太原本打算順產，後來醫生同護士覺得有啲風險，所以建議開刀生，佢大讚公立醫院水平好，醫護人員都好體貼同細心，提醒佢好多嘢喎。

對囝囝有乜期望？佢話依家最希望囝囝健健康康，將來就算面對大風大浪都頂得住，唔好失去自我咁話。