政情：譴責許智峯委員會 冀暑假前完成聆訊
立法會議員許智峯早前喺立法會搶去政府女高級行政主任（EO）嘅手機，有關譴責議案嘅調查委員會尋日進行第五次閉門會議。調查委員會主席麥美娟喺會上已進行咗第一次聆訊，希望盡快完成工作，盡快向立法會提交報告。
進展保密 僅稱證人合作
麥美娟又話委員會尋日朝早進行咗第五次會議同第一次聆訊，但目前仍需對聆訊人的名單同進展保密，未能公開，僅稱尋日出席嘅證人表現合作，願意回答問題，稍後會繼續傳召其他證人聆訊，希望能在暑假前完成，讓秘書處可在暑假期間寫報告。
立法會喺舊年四月審議《廣深港高鐵（一地兩檢）條例草案》期間，許智峯喺大樓內強搶女EO嘅手機，及後被控不誠實取用電腦、普通襲擊同阻礙公職人員執行公務，早前法庭裁定三罪全部罪成，許智峯被判二百四十小時社會服務令兼罰款三千八百元。
不過，有建制派議員對判刑表示非常失望，指收到唔少市民反映，指許智峯毋須判囚，係唔公道，希望律政司提出上訴，讓法庭判更具阻嚇力嘅懲罰，而當時律政司則回應話會研究法庭判詞，再決定會否提出上訴。