政情：周庭咳到肺都甩 羅冠聰「喵喵」療法使得？
健康幾時都最重要，一旦病咗真係好辛苦，特別係斷唔到尾。好似香港眾志成員周庭最近就咳得好厲害，仲話咳到甩肺，你估佢啲戰友點回應？
袁嘉蔚留言好多「汪」
其實周庭一連幾日喺Facebook都有貼文講病況，雖然全部貼文都算簡短，但絕對睇得出佢有幾頂唔順！事關佢最初發文時已經講明「跪求聽日出到聲」，似乎已經開唔到聲，但幾日嚟唔單止冇好轉，仲每況愈下，例如反問「如果咳得太犀利，個肺係咪真係有機會甩o架？」，又話「Feel到個肺甩甩哋」，甚至嚴重到連佢唯一嘅減壓方式，即係唱歌都冇埋！
唔少網友見周庭「病入膏肓」，都畀咗唔少建議佢，例如食乜嘢潤喉，係咁叫佢睇醫生，亦不斷提醒佢多啲休息，好好保重身體，然而喺佢其中一段打咗好多個「咳」字嘅貼文入面，就見到佢嘅戰友羅冠聰嘅回覆，但佢只係打咗好多個「喵」字，而羅嘅女友袁嘉蔚亦留低咗好多個「汪」字，究竟佢哋想表達啲乜嘢？抑或係提供緊獨特嘅治愈方法？