政情：民主派挾勢搞事 建制死守防博亂

翻查資料，中區軍事碼頭係中國及英國政府喺一九九四年訂明未來安排嘅各香港軍事用地中，唯一尚未移交駐軍嘅軍事設施。主要建造工程喺二○一三年大致完成，修訂城市規劃嘅程序就要今年二月先搞掂，所以政府喺今年五月刊憲登出五項附屬法例給予適當法律保護，包括將碼頭列為「禁區」不容許未獲駐軍個別批准的人進入；其餘陸上範圍會列為「受保護地方」。

軍事碼頭修例 廢除難度十分高

立法會喺五月都召開過附屬法例小組委員會討論，進出口界議員黃定光（象哥）自動當選主席，審議期間都任由議員提出疑問，由保安局官員回應，過程尚算順暢。政府亦一早預告喺今日大會上，以擬議決議案形式提交，如無反對，相關法例就可以如期喺本周六（29日）生效，反之要廢除修例就要經在席分組點票獲過半數支持先得，難度十分高。

區諾軒提嘅修正案就係列明要「廢除」五項附屬法例，朱凱廸就提三個修正案，分別將生效日期延至二○二○年、二○二一年及二○四七年等，分兩條戰線處理。朱凱廸尋日話市民之前唔理解，只要知道多啲，就唔會想將海濱用地「割」畀駐軍用，仲話政府至今未正面回應市民就反對修訂《逃犯條例》嘅要求，質疑係咪想再要人圍多次立法會喎。

審議係走程序 黃定光唔怕倒戈

問到有冇擔心今日審議有阻礙，象哥豪言：「咁都要開會（口架）！」唔通乜都唔做咩？而綜合各方消息，建制派認為審議附屬法例只係走程序，塊地一早就規劃咗做軍事碼頭，鬧班泛民想博亂借個勢搞事，同埋要大比數支持修正案通過唔係易事，就算少一兩個建制派投票都可以阻到，但依家無人覺得要支持班泛民搞事，應該唔會有人倒戈。

民主派方面，據悉佢哋都未能掌握局勢，問到通過修例後係咪真係會包圍立法會？市民回響有幾大？民主派唔少人都擰頭話唔知。其實依家示威者都係網上動員，經常都話唔要「大台」，就係唔想畀泛民騎劫，相信今日大會上定必有一番激辯，但最終又會唔會引起市民關注呢？大家拭目以待嘞！