中環出更：糖鹽分唔到 梁賀琪焗錯鹹蛋糕
自己煮嘢食梗係健康過出街食喇！尋日仁愛堂搞咗個慈善晚宴，卓妮見到總理梁賀琪，原來佢好鍾意煮嘢食，仲自爆曾經有次整甜品，個樣好靚，點知朋友食咗啖，話點解鹹嘅，佢先知搞錯咗糖同鹽，整咗個鹹蛋糕出嚟，認真搞笑。
梁賀琪話出身基層家庭，自細就同媽媽一齊煮餸，所以自小就愛上烹調，最拿手係豉油王炒麵，再加上鍾意煮又鍾意食，所以佢會不斷嘗試煮唔同嘅菜式，只要屋企人同朋友食得開心，佢就開心嘞！佢仲話乜嘢都鍾意食，上至高級餐廳，下至地道嘅食品，例如雲吞麵同雞蛋仔都鍾意。
戴凱倫過節煮中餐畀父母
轉頭見到仁愛堂前主席羅台秦嘅女兒、現任總理戴凱倫，佢話喺美國讀書，所以鍾情於西餐，而且係上網搵資料同睇短片學煮嘅，仲自爆曾經煎燶牛扒添，但佢仍然屢敗屢戰，而喺過年過節時都會試吓煮中餐畀爸媽食，雖然自知未必咁好味，但爸媽都食得好開心。
仁愛堂主席連卓鋒係潮州人，亦喺香港開咗間潮州食肆。佢話好鍾意去唔同嘅地方試菜，返到家鄉都不斷試菜，食咗啲家鄉菜同香港嘅味道唔同，佢都會學點煮法，再買埋番家鄉用嘅食材帶番香港煮，希望喺香港嘅潮州人都食到家鄉嘅味道喎。
跟住見到總理朱耀中同未婚妻Kathy拍拖到場。朱耀中喺上海人，佢話爸媽經常喺屋企煮上海菜，所以佢都好鍾意食，仲話Kathy都鍾意煮嘢食，最拿手係番茄炒蛋同蒸魚，間中仲會煲湯，所以有時佢哋都會玩吓煮飯仔，而Kathy就話會繼續學煮嘢食，希望可以煮多啲唔同嘅菜式。
卓妮