中環出更：細個落舖頭打算盤 陳建年：計錯冇人鬧
俗語話「一樣米養百樣人」，從事白米生意嘅商人更加明白箇中道理，就好似早兩日香港米行商會（商會）成立一百周年晚宴中，理事長陳建年講出佢嘅童年回憶，話中學時期最大娛樂之一就係落舖頭幫手。
點解呢？陳建年話落舖頭做吓文書工作同埋學打算盤，因為自己讀書時係用計數機，落到舖頭係用算盤計數，所以覺得好新鮮，有時都會計錯數但家人冇責怪佢，問到依家仲識唔識用算盤計數，佢話已經忘記咗，但有時間嘅話都好想學番。
李豐年爬穀山周身痕
出席晚宴嘅仲有商會理事李豐年同立法會議員邵家輝，李豐年話喺二十幾歲時去泰國參觀米商，唔知道穀會令身體痕癢，見到貨倉有一座八呎高金黃色穀山，諗住爬上去擺甫士影張靚相，殊不知影完相落返嚟之後發覺周身痕，先知道穀會令身體短時間痕癢。咁點解穀會令人痕癢？佢話因為要保護裏面啲米，所以有件保護衣，仲教路揀米係一種學問，米有長有短，有少少彎好似女性小蠻腰咁就一定係靚米！
邵家輝就話唔係做白米生意，但就有一個好深刻經歷，話有次同太太喺屋企玩煮飯仔，點知煲飯時落唔夠水，整到成煲飯好生要再煲過，自此之後佢煲飯已經攞到落水竅門，煲飯已經冇難度。
轉頭又見到做米業生意嘅源美棠，佢話細個時經常到上環公司幫手，聽到家人成日講每一粒米種到出嚟唔係一件容易嘅事，粒粒皆辛苦，所以食飯時候會將碗內嘅飯盡量食清晒，唔好浪費，佢仲透露由細到大都好鍾意食飯，就算打邊爐都會叫碗飯嚟食，咁先開心啲。
卓妮