政情：今日你上鏡：掛拍多年依然勤操 陳念慈力保肌肉
運動員退咗役，唔代表恒常嘅鍛煉可以告一段落。見習騎師訓練學校校長陳念慈過去係羽毛球運動員，雖掛拍多年，但仍然勤於操練以防肌肉流失。佢尋日出席一個活動時講起自己保持肌肉嘅方法，就係一星期至少三次游水，不時又會去健身，喺屋企就會做吓自身負重嘅動作，譬如半蹲、掌上壓同Situp同埋拉筋就每日都會做。
佢話，一個人如果成日都唔郁，久而久之肌肉就轉變為肥肉，身材大走樣之餘，體能亦隨之衰弱，就連身體裏面嘅鈣都會流走，導致骨骼無力，上咗年紀就會成為佝僂老人，呼籲年逾半百嘅人士必須運動，以防肌肉流失。
謝絕煎炸肥膩
保持肌肉要靠運動外，飲食都好重要。陳念慈話，自己向來飲食清淡，謝絕煎炸肥膩，仲會多飲水同盡早食晚飯，以免擾亂睡眠質素。佢又話，無充分嘅休息嘅話，做運動嘅效果都會打折扣咁話。