政情：邊接龍邊踏步 李世榮兩周瘦20磅
堅持做運動的確係一件幾難嘅事，沙田區議員李世榮近日喺社交網站貼文話，有「接龍」陪住，做運動嘅時間過得好快喎。之後問番佢，原來係一邊玩「接龍」，一邊行踏步機，兩星期已經瘦咗二十磅喇，真係幾驚人！
為着靚衫決心減肥
李世榮話，佢原本有二百四十磅，貪靚有啲衫想着，但又着唔到，於是下定決心減肥，一開始要堅持做運動真係唔容易，但後來發現屋企樓下嘅踏步機有得玩接龍，於是就一邊玩一邊做運動，每打爆一次都要半個鐘，打爆兩次，不經不覺就做咗成個鐘運動嘞，連歌都唔使聽。
佢話依家都有節食，夜晚唔食飯，淨係食餸，中午就可以食得豐富啲，堅持咗兩星期已經減咗二十磅，依家有二百二十磅，希望最好減到一百八十幾磅，仲要繼續努力，希望遲啲可以着到啲想着嘅衫啦。