政情：行程旅費 爸爸安排好 徐英偉：父母係寶
好多人話「家有一老，如有一寶」，長輩嘅陪伴真係令人好開心，好似勞工及福利局副局長徐英偉（Caspar）尋日出席一個活動時話，佢爸爸媽媽係佢嘅寶，雖然唔係一齊住，但住得好近，成日會見面，仲會一齊去旅行，自爆一齊去有好多好處，就係爸爸會安排好晒行程同旅遊費添，聽落真係慳唔少！
每周都帶仔女探爺嫲
Caspar話，其實都唔係為咗慳錢，主要係畀爸爸感覺到佢有能力去處理，可以令到屋企人開開心心。佢又話，自己細個嘅時候爸爸都成日帶佢去探爺爺嫲嫲，所以依家最少一星期會帶小朋友去見爸爸媽媽一次，兩老亦很多時會過嚟同兩個孫玩。
咁見面嘅時候會做咩呢？佢話，兩個孫多數會同爺爺嫲嫲捉波子棋及象棋，鬥智鬥力，又會一齊睇吓書，捉棋會令到兩老腦部思考吓，冇咁容易有退化症出現咁話喎。聽落真係一舉兩得！