政情：公開信呼籲特赦 民主阿婆自打嘴巴
近期修訂《逃犯條例》風波愈鬧愈大，令到「搞事四人幫」都頻密聚首同發功，尋日就輪到有「民主阿婆」之稱嘅前政務司司長陳方安生出手，以朋友、前同事身份向特首林鄭月娥發公開信，要求考慮向「612暴動」被捕人士作出特赦，真係出嚟搞笑。
民主阿婆早喺本月九日，就與同屬「搞事四人幫」嘅「漢奸黎」壹傳媒黎智英、民主黨創黨主席「李漢奸」李柱銘及天主教香港教區退休主教陳日君一同現身，參加民主派發起嘅反修例遊行。點知三日後嘅反修例集會就演變成暴力衝突，以及上周日（16日）嘅反修例遊行後，政府終於跪低宣布暫緩修例。
暫緩修例未減少曝光
不過，民主阿婆未有因暫緩修例而減少曝光，尋日又向林鄭發公開信要求撤回修例、設立獨立調查委員會調查警民衝突事件及一次過特赦參與示威嘅被捕人士，仲話相信讓步可以令擾亂公共秩序等行動停止喎。之但係，呢啲建議聽落好似同佢經常掛喺嘴邊嘅民主、法治等核心價值並不相符，如果佢仍然擔任政府第二把交椅，真係令人懷疑講唔講得出上述嘅要求喇。
其實民主阿婆嘅政治能量早就用得七七八八，但仍然不甘寂寞經常對香港事務指手畫腳，又外訪「唱衰香港」，現時仲要自打嘴巴教政府做事，呢鋪真係自暴其短喇。