中環出更：李嘉莉旅遊遇意外 言語不通成求醫障礙
旅行只為開開心心，但萬一中途生病或出意外，就難以避免要喺當地求醫。卓妮早前就見到唔少名人，一傾之下發現唔少都有外地求醫經歷，但就試過出現言語不通嘅情況，咁點收科呢？香港潮屬社團總會會董李嘉莉早前出席總會搞嘅頒獎禮，佢同另一名會董林月萍都講起，試過去日本求醫，李嘉莉仲講起試過入醫院十幾日咁大鑊，同當地嘅救護員言語不通，出現溝通問題添。
李嘉莉透露，新年去日本滑雪搞到左腳大髀斷骨，由上白車開始，已經出現溝通問題，好似叫救護員「Hold」但對方聽唔明，結果將其左腳抬起就即刻出現咔一聲，不過大家繼續保持冷靜喎，聽落場面好尷尬喇，而佢住院期間發現情況同日劇一樣，醫生同護士都係靚仔靚女，更有一對一物理治療，費用亦較香港便宜，若非媽媽有意長途跋涉飛日本探望，佢都會選擇繼續喺日本留院喇。聽落當地嘅醫療似乎唔錯喎！
陳光明每年赴泰體檢
當日都有唔少政商界人士捧場，包括總會永遠名譽主席莊學山、前食物及衞生局局長高永文、旅遊業議會主席黃進達、中華總商會常務會董陳光明等。陳光明就自言注重健康，好多年前已經有定期接受身體檢查嘅習慣，加上有朋友係泰國開設醫院，所以每年都會趁公幹去當地接受身體檢查，貪即日就有報告，易啲安排時間咁話。至於黃進達亦指，台灣、新加坡等地嘅醫療費用平，吸引唔少人做身體檢查兼旅行，但就以自由行旅客為主。佢又講起，過往搞旅行團時，旅客經常因為水土不服要入住當地醫院，所以真係要買旅遊保險喎。
不過，本身係醫生嘅高永文就對香港醫療系統投下信任一票，佢話外國醫療費用或較便宜，但做身體檢查唔止講求數據，之後嘅跟進、解釋等同樣重要咁話。唔知算唔算係賣花讚花香呢？
卓妮