政情：吳宏斌接掌信保局諮詢委員會
政府咁多委員會，要搵人才，好多時都會向商會埋手，貪佢哋熟悉香港嘅經濟環境，處理同經濟有關嘅事宜時，都考慮得周詳啲，近日又有類似情況出現。政府尋日公布，委任香港中華廠商聯合會會長吳宏斌接替香港工業總會副主席嚴志明，出任香港出口信用保險局（信保局）諮詢委員會主席。似乎又係喺四大商會中搵人才嘅例子嘞。
下月起任期兩年
信保局諮詢委員會嘅職能，係就保險及與投資有關嘅業務向信保局提供意見，委員會成員包括來自金融、保險、貿易、服務等。政府尋日公布委任吳宏斌接替嚴志明做主席，任期兩年，由下月一日起至二○二一年六月三十日。商務及經濟發展局話，吳宏斌具豐富營商經驗，積極參與公共服務，相信佢能帶領信保局，繼續向本港出口商提供專業嘅出口信用保險服務。