政情：鍾國斌睇時裝騷諗遊行造型
又到學期尾，有啲學生哥早已考完試放暑假，至於讀時裝設計嘅學生，臨近暑假前都會搞番個時裝展，展示下啲成果。立法會紡織及製衣界議員鍾國斌（Felix）近日喺社交網站講起，去咗一個學生時裝展，見到部分設計啱晒遊行。到底有咩時裝設計會啱遊行着呢？唔通有防催淚彈同橡膠子彈嘅功能？
做頒獎嘉賓 支持學生創作
睇番Felix貼出嚟嘅相，一係就有好大頂帽遮晒塊面，一係就係有眼罩同有塊布遮住塊面，真係完全見唔到模特兒個樣，唔怪得佢講笑話呢個系列可以適用於不同場合，包括遊行。之後問番Felix，佢話臨近學期尾都會盡量抽時間去睇學生時裝展，支持吓年輕人嘅作品，今次就係去做頒獎嘉賓，冇份做評判，仲話近日都有啲學生時裝展想去，但去唔到。