政情：建制圍插 避角色衝突嫌疑 范國威棄做主持
為防被攻擊有利益衝突，立法會議員好多時喺發言前以口頭方式申報利益，以免招人話柄。作為立法會公務員及資助機構員工事務委員會主席嘅范國威（Gary），就喺會前去信委員，要求就上星期金鐘反修例衝突事件開設特別會議討論，佢仲打算以主持身份討論添！結果被一眾建制派議員圍插，包括委員會副主席廖長江，認為佢有角色衝突。最終Gary聽完廖長江講完，就決定暫時唔做主持，唔知係咪費事同建制派嘈呢？
近日修訂《逃犯條例》爭議愈演愈烈，上周三（12日）金鐘仲發生流血衝突事件，Gary就懷疑當日警方阻撓醫護人員進行救護工作，認為唔同紀律部隊可能喺執行職務上會有衝突或者唔協調，擔心會影響公務員士氣，以及日後會再發生，所以先要求喺下次會議上討論。
當其他議員還未發言前，廖長江就話封信係由Gary發出，質疑佢係咪唔適宜再主持呢個討論。Gary就解釋，已經問咗秘書處意見，都話可以由佢處理番，佢仲話自己會公平處理，但廖長江就似乎唔收貨，雖然話唔係爭做主持，不過都有要求秘書處再解釋，質疑係咪有角色衝突，而最終Gary都係聽廖嘅意見冇做主持，但就話係費事拗落去處理唔到其他議案喎。
兩派爭論 耗會議逾半時間
以為件事完結啦，點知其他建制派都隨即發言，批評Gary封信嘅內容係冇事實根據，認為應該係將信件轉介去相關部門跟進，又指如果乜嘢都放上事務委員會討論，唔知要開多幾多次會喎。至於泛民方面，議員譚文豪就有幫口，話以前都出現過類似事件，仲認為如果係涉及政策層面，應該要喺事務委員會上討論。
時間過得好快，喺班議員你一言我一語咁嘈生晒嘅情況下，兩個鐘會議就用咗超過一半時間。其實會議要討論公務員來年度薪酬調整，以及僱用殘疾人士為公務員嘅議案，唔知係咪大家都擔心公務員遲加人工而士氣低落，議員都好合作地極速用差唔多四十五分鐘時間去討論，快快手通過埋等上財務委員會審議。
好彩薪酬調整都趕到尾班車，因為如果要等下次例會，等埋財委會通過，班公務員就趕唔切七月底加人工。不過依家財委會仲塞緊車，相信班公務員仲要擔心多一排喇。