中環出更：憲報接連出錯 撈亂劉江華陳積志行程
各政策局長離港期間，由副局長署理職務，都唔係咩新鮮事，每次署理職務，憲報都會公布，等各界知道嗰幾日搵邊個吖嘛。不過，近日憲報就接連出錯，其中一項就係突然聲稱民政事務局副局長陳積志將會喺局長劉江華離港公幹期間署理職務，但原來劉江華近日根本冇離港，反而係陳積志要離港公幹，最終憲報都要出個勘誤。
話說上周五刊憲話劉江華喺本周三至下周二離港公幹，但本周五又刊憲勘誤，話要取消署理委任事。據知，原來劉江華近日根本冇離港公幹，反而陳積志先係近日離港公幹嗰個，真係唔知點解會出現啲咁嘅錯誤嘞，唔通係撈亂咗兩個人名？
上次刊憲錯署理職務日期
憲報唔止一樣出錯，仲有另一個勘誤公告，同樣係同署理委任有關。本月六日曾經刊憲指商務及經濟發展局局長邱騰華將會喺本月九日至十八日離港，期間由副局長陳百里署理職務，但周五刊憲勘誤，指陳百里只係署理職務至十四號下午啫，即係早咗幾日，相差日子都頗多，今日都已經廿二號，成件事都完晒先刊憲更正，都算幾遲吓喎！
卓妮