中環出更：網絡資訊齊備 鄺紫凌呻減旅行景點魅力
科技洪流之下，好多事物都起咗深刻嘅變化，就連出門旅遊都唔例外。好似金紫荊女企業家協會常務副主席鄺紫凌早前出席該會嘅一個分享會時，就講起有次打算去英國格林威治天文台睇本初子午線，點知佢老公就話網上有大量格林威治子午線嘅影像任睇，毋須由倫敦花三小時驅車前往啦。聽落都有啲掃興喎！佢話，依家資訊爆炸，上網搜尋目的地資訊，的確係既方便又詳盡，但披露得太多，有時會減低目的地嘅魅力o架。
鄺紫凌又話，以前到海外自由行，旅遊書就係「盲公竹」，絕對係不可或缺，但係內容愈詳細就愈厚同愈重，依家只要手機上到網，就可以搵到啲旅遊資訊嘞，加上有咗GPS導航後，睇地圖亦唔再係旅行必須嘅技能。不過，佢又話，以前試過跟地圖走錯路，反而發現異鄉有另一番有趣景像，有種不期而遇嘅感覺，令到旅遊增添一重探險嘅色彩。
蘇嘉媛話可訂監獄「宿一宵」
今次嘅活動邀請咗從事網絡旅行社嘅蘇嘉媛，講吓資訊科技喺旅遊上嘅應用。蘇嘉媛話，網上平台最明顯嘅優勢，就係快捷、方便同選擇多，形形色色嘅住宿都可以輕易預訂，無論樹屋、船屋甚至監獄，都可以「宿一宵」，為咗向客戶提供貼心服務，網絡旅行社往往都會設立電話服務中心，以語音交流嚟解決客戶一切疑難，不過原來愈年輕嘅客戶群，就愈傾向透過操作介面去處理取消預訂或更改行程等事宜，而較年長嘅客戶，就要通過電話嘅真人對答，先至覺得安心同踏實。
轉個頭又見到金紫荊女企業家協會常務副主席鄭美恩，佢就話，雖然網絡平台可以一站式安排機票同住宿，但組團旅遊需要富經驗嘅旅遊顧問設計行程，因此旅行社仲有其生存空間咁話。
卓妮