香港最近發生嘅事經常出現急速變化，跟得唔貼就會追唔到個狀態。話說大埔區議會主席黃碧嬌，本來打算批准該區民主派區議員討論反對修訂《逃犯條例》嘅動議，但尋日同秘書處開會，檢視政府各部門嘅回應，發現區議員質詢問題基本已有答案，最終拍板決定唔批准下月大會作相關討論。
黃碧嬌承認區議員提動議時間足夠，合乎會議常規，本應打算同其他委員會一樣咁處理，但因為呢排修例事態發展急速，尋日再同秘書處審議有關動議內容時，發現係講及警方喺處理上周於金鐘發生衝突嘅手法，而前晚警方突然召開記者會，當時已經回應咗區議員大部分問題，故認為不宜再喺大會討論。
佢又話相關警民衝突唔係喺大埔發生，而警方都已經詳細回應，區議員如有特別跟進可以同部門聯絡，甚至有投訴可按當局現行機制處理，希望大會集中處理大埔區內事務為先。