政情：郭偉強落區爬山 突然諗起鹿尾巴
一首成功嘅廣告歌，對一代人嚟講係集體回憶，亦係印證歲月留痕。立法會議員郭偉強尋日一早去爬山，幾乎九十度直角向上爬，睇見都牙煙，但就令佢諗起一個一九八七年一款含鹿尾巴成分嘅中成藥廣告，其中一句對白：「擒高擒低，靠腰力，靠腳力」，唔通佢扭親要補身？
原來醒起廣告對白
郭偉強話冇整親唔使補身，憶述小時候成日睇電視，以廣告撈飯，所以好多歌都會入晒腦，尋日落區視察斜坡時，突然想起嗰句對白啫。小朋友唔係睇電視劇多？佢坦白，小朋友邊度識得睇，未必可以理解到內容，當然廣告歌最入腦喇！
佢又話讀小學時返下午班，返學前就只有粵語長片，自己都係睇得多，先學識人情世故咋！佢仲話廣告對白係踢爆自己年齡，相信大家聽過呢個廣告送飯，就應該已踏入中年喇喎！佢現年四十一歲，廣告推出當年佢先得九歲，剛好係電視送飯年代，唔知有幾多人同佢「友共鳴」呢？