政情：梁志祥自學書法 匿埋議辦密密寫
隨住科技發達，唔少人都會變得執筆忘字。做過元朗足球會會長嘅立法會議員梁志祥（祥哥），原來唔止踢波了得，平日更會匿埋喺辦事處練書法。唔通平時畀班反對派激得多，要寫字修心冷靜吓？
祥哥笑言寫書法寫咗好耐，但從來都冇跟老師學，只係買啲書返嚟抄寫，反而個仔讀小學時，就有請老師教佢書法，「點知（阿仔）依家手字仲肉酸」。佢解釋，字係一定要練習，如果印帖寫就會好費神，但可以學到筆畫點落，平時都係「抄考」吓就算喇！
想留底唔用環保水寫紙
近來有啲環保書法紙用水寫，會唔會考慮用？佢就話用過，但又想留番啲字翻睇，先知道自己有無進步，最後都係轉用紙，不過佢會用盡啲位寫，唔會浪費o架！其實好多人都學過書法，可能唔夠耐性或恒心，中途就丟低咗，而祥哥都算係相當堅持嘞！