中環出更：撞正示威潮「青年委員自薦」難招兵
政府話關注青年人，仲話青年發展工作係施政重點之一，由政務司司長張建宗做青年發展委員會主席，但係政府有冇真正聽到青年人嘅訴求，若果有嘅話，點解會引發咁多青年人上街反逃犯修例，仲爆發暴力衝突，睇嚟張建宗都要深切反省。
話想吸納年輕人聲音
原屬民政事務局嘅青年事務委員會升格做更高層次嘅青年發展委員會，話透過委員會致力做好青年嘅「三業三政」工作，即關注青年學業、事業同置業，並鼓勵青年議政、論政同參政。之後，張建宗亦動作多多，搞「司局長同行」，等青年人跟住問責官員一日，睇吓啲官點做嘢，其後仲拍埋短片硬銷「青年委員自薦計劃」，話畀啲青年人加入相關委員會做委員，等佢哋就唔同嘅範疇畀意見。
第三期嘅「青年委員自薦計劃」尋日公開招募十八至三十五歲嘅人士參與，名額共廿個，申請喺下月十七日截止，而參與計劃嘅委員會包括撲滅罪行委員會、精神健康諮詢委員會、電訊服務用戶及消費者諮詢委員會等等。
老實講，政府口口聲聲話關注青年嘅未來發展，亦想吸納更多青年人嘅聲音，做咗咁耐，成效係點呢？睇吓一波又一波嘅反修例遊行，證明政府係失敗喇，青年工作都只係做門面工夫，搞到今次爆大鑊，張建宗攝高枕頭諗吓應該要點做？
卓妮