中環出更：董吳玲玲講品茶大談中國歷史
茶不但有益身體，亦可調節心靈。慈善機構小母牛日前舉行慈善晚會，善德基金會主席董吳玲玲就捐出珍藏嘅普洱茶出嚟拍賣。董太話中國雖然係茶嘅發源地，但今日一講到同茶有關嘅文化，就唔及古人咁講究喇！
董太話現時華人社會，品嘗茗茶就好似飲水咁平常。其實古代嘅文人雅士，早就喺品茶活動當中發展出一套高雅精緻嘅茶文化，然而某位皇帝嫌品茶程序太過麻煩，費時失事，於是就下令簡化，從此中國嘅茶文化就走向式微。佢又話古代嘅品茶活動無疑係頗為繁瑣，但其實亦有其功能，尤其係生活緊張嘅現代人，可以於品茶各個程序當中鬆弛一下，靜心感受細意回味每啖茶嘅幽香甘美，從而達到紓緩精神之效。
自小就鍾意品茶嘅董太話，內地唔少有識之士，都提倡要復興中國嘅茶文化，而佢亦透過泡茶同孫兒溝通咁話。善德基金會副主席藍國慶亦喺董太身上習得品茶嘅愛好，以致每逢上茶樓都要自攜董太推薦嘅普洱茶。
黃家和鍾意熟普洱
講起普洱呢種好多港人愛飲嘅中國茶，香港餐飲聯業協會會長黃家和就話普洱茶其實係有生熟之分。生普洱係指茶葉未經人工發酵處理，熟普洱就相反，所以兩者嘅茶色同味道都大有分別，而茶味甘醇嘅熟普洱，就最受港人歡迎。佢又話依家年紀大咗，亦漸漸愛上有「益壽茶」之稱嘅熟普洱，因為熟普洱茶性溫和，養胃消滯，而泡普洱茶時再加一塊靚陳皮，茶味就會滲透果香，同增添順氣健脾之效。
不過，中華廠商聯合會常務會董陳家偉就好少飲茶，因為佢嫌飲茶之後會失眠，反而飲咖啡就冇呢個現象。至於點解茶對佢嘅睡眠影響會大過咖啡呢？佢就話冇深究喇！
卓妮