政情:收料站:八委員會會議取消 改期日子難預料

受到立法會加會審議修訂逃犯條例草案嘅影響,至少有八個事務委員同小組委員會因怕撞期而取消會議,咁多會議要取消要改期,都唔知幾時先補得番。

立法會尋日發出多份文件,當中有五個事務委員會會議、兩個小組委員會會議同埋一個草案委員會,同時要取消原擬嘅會議,而首當其衝嘅係喺十四號開會嘅教育事務委員會,同埋交通事務委員鐵路事宜小組委員會會議都取消。

喺十七號亦有四個會議要取消,包括衞生事務委員會同食物安全及環境衞生事務委員會嘅聯席會議、政制事務委員會會議、衞生事務委員會會議,以及《2018年廢物處置(都市固體廢物收費)(修訂)條例草案》委員會嘅會議。

而人力事務委員會同房屋事務委員會跟進本地不適切住屋問題及相關房屋政策事宜小組委員會,本來定咗喺十八號召開會議,而尋日亦話取消,要改期開會。

立法會嘅日程已經排得密麻麻,依家一口氣取消咁多個會議,日後要改期再開會,睇怕班議員都撲得好辛苦。

第一手消息請下載on.cc東網iPhone/iPad/Android/Windows Phone Apps