政情：潘偉業搵好隊長 龍舟賽比上年強
喺上周嘅端午節，好多地區都有舉辦龍舟競渡，而菁英會亦有參加喺赤柱舉行嘅賽事，該會副秘書長潘偉業今次做領隊，佢話今次賽事攞到第六名，大家都開心。唔係呀？三甲不入都開心，佢話已經好過舊年好多，舊年連名次都排唔到。
多得鄭重科執掌
點解今年賽事咁大進步？原來菁英會嘅龍舟隊受過特訓，仲要多得今次賽事嘅隊長、該會副主席鄭重科，教佢哋扒龍舟嘅技巧。原來鄭重科本身都參加咗好多龍舟隊，一個星期都扒幾日龍舟，而菁英會今次參加比賽嘅兄弟姐妹，事前都上咗十堂課，每堂課兩粒鐘，所以先得到今次咁好嘅賽果。難怪當日攞到第六名，大家都咁開心喇！
潘偉業本身都鍾意運動，見佢啲膚色黑咗咁多，佢話都係拜扒龍舟所賜，事關當日烈日當空，佢每隔一個鐘頭就搽防曬，但都係敵不過艷陽天，仲要由朝曬到晚，唔黑至奇。