中環出更：張建宗好急促 冀四法案恢復二讀
立法會近期爭議不絕，然而立法會本立法年度亦即將到尾聲。政務司司長張建宗（小肥張）近日就去信立法會主席梁君彥，話計劃將《國歌法條例草案》等合共四條政府法案提交上立法會恢復二讀，望梁可於本年度完結、即七月中之前嘅餘下會議安排時間。不過，立法會現正審議具迫切性嘅重要議案，民主派隨時拉布，小肥張嘅願望係咪可以實現，真係言之過早喇。
望暑假休會前通過難實現
小肥張喺信中指出，希望將《國歌法條例草案》、《二○一九年稅務（修訂）（稅務寬免）條例草案》、《二○一九年司法人員（延展退休年齡）（修訂）條例草案》，以及《二○一九年選舉法例（雜項修訂）條例草案》喺立法會本年度餘下會期恢復二讀辯論，並於暑假休會前通過。而唔止呢四條法案，政府亦打算動議有關資深司法人員任命嘅政府議案，而有關議案亦須喺暑假休會前通過。
立法會依家審議緊嘅法案，分分鐘拖成兩個星期，換言之立法會最快可處理其他政府法案可能已經係本月廿六日，計埋本月廿六日只有三次立法會大會，而《國歌法條例草案》亦係民主派強烈反對嘅草案之一，小肥張似乎真係大想頭咗啲喇。
卓妮