中環出更：讚賞外國學校 史立德採光設計可倣效
校園生活對學生係好重要，香港中華廠商聯合會副會長史立德早前去咗歐洲一轉，參觀咗當地好多大學，佢對維也納嘅大學校舍嘅設計讚不絕口，地方大不在話下，設計上亦用咗好多採光，自然光透入校舍好舒服，相對香港嘅大學校舍好似石屎森林咁，認為可借鏡用多啲採光嘅設計。
其實，今次同史立德同行嘅仲有另一名副會長、「家電大王」陳國民、香港工業總會名譽會長鍾志平同香港玩具協會名譽會長陳明耀，佢哋先後去咗波蘭、克拉科夫、維也納、德國慕尼黑同柏林等地。史立德話佢哋去參觀咗昔日猶太人嘅集中營，睇到啲資料認識到當年喺集中營嘅猶太人好艱苦，日日生活喺惶恐之中，印象好深刻。
倡廠商宜引入機械生產線
遊覽之餘亦不忘睇吓歐洲嘅工業發展，之後佢哋轉到德國參觀一間車廠，史立德話車廠高度機密，有得睇冇得影相，又形容廠方採用機械人嚟生產汽車，相關技術真係好犀利，尤其依家內地請人難，成本又高，佢認為無論本地同內地廠商都可以考慮引進機械人入生產線，減省相關成本。
佢哋其中一個行程就係去遊河，仲要喺船上度過幾日。史立德形容隻船好似郵輪咁，有成百幾間房，船上亦有好多設施，唔會悶。而鍾志平亦話遊河好好玩，但佢印象最深刻嘅反而係參觀一個鹽洞，佢話當地將鹽洞內嘅鹽挖晒出嚟之後，仲利用洞內牆壁嘅石塊進行雕刻，有祭壇同石像等等，咁大嘅製作，真係好值得去睇吓。
卓妮