市民望上樓望到頸都長，但係公營房屋嘅供應量未來五年都唔達標，都唔知要等到何年何月。房屋委員會尋日開會，有委員直斥房委會四年嚟空言加建公屋，但係供應量就「斷崖式」下跌，仲話三年上樓簡直係天方夜譚。老實講，三年上樓呢個承諾早已唔存在，事關輪候公屋條隊預料年內「破六」，即係要等六年，供應量繼續跌落去，條隊只會愈排愈長，唔鬧爆運輸及房屋局局長陳帆先奇喇，佢再唔想方設法起多啲公屋，肯定民憤爆燈呀！
