政情:無經費難撐 房評會告別江湖

有四十年歷史嘅房屋政策評議會(前稱公屋政策評議會)告別大家嘞!早喺八、九十年代好有影響力嘅壓力團體公評會,近年的確沉寂好多,少就房屋議題發聲,該會主席鄭清發坦言無經費,難以維持落去,雖然好多朋友都話好可惜,住屋問題今時今日仍然嚴峻,但該會歷史任務應告一段落,無奈告別江湖。

搞英雄宴 籌款找數

房屋政策評議會前晚喺大坑東擺下告別江湖英雄宴,筵開十席,籌得五萬多元,作為結束該會嘅經費,支付欠款、核數同律師費等。包括民協前主席廖成利等好多政界中人都有出席晚會,大家都依依不捨。

七十年代尾,隨住大坑東、李鄭屋、大窩口邨嘅七層大廈重建,多個組織成立公屋政策評議會。到八十年代,公評會獲教會贊助經費,聘請全職員工發展會務,九十年代改名房屋政策評議會,全面關注整體房屋問題。四十年來,房評會一直關注徙置區、天台屋、擠迫戶、租金問題、富戶政策、建屋速度、屋邨管理、公屋輪候等議題,並推動居民參與。

第一手消息請下載on.cc東網iPhone/iPad/Android/Windows Phone Apps