政情：八網難逃：醫管局贏三角友誼賽 梁栢賢攞彩
醫院管理局行政總裁梁栢賢（PY）退休，扣埋假期喺七月三十一日就Last Day，所以依家佢出席醫管局啲活動就好似倒數咁，不停話呢次係任內最後一次嘞，但相距佢離開醫管局唔夠一個月，竟然攞彩喎。
話說PY日前喺Facebook 上載咗啲相，仲貼文話醫管局、警察部港島總區同銀行界舉行咗足球三角友誼賽，憑着同事們嘅拚搏精神同得到幸運之神眷顧，醫管局僥倖贏得冠軍，實在值得高興！
網友：醫局交波叻
當日PY主持開球禮，但見到醫管局贏波梗係開心喇，唔少網友大讚醫管局好叻，事關紀律部隊好fit， 贏到佢哋真係好叻，亦有網友讚醫管局好波，但有網友就留言話「醫（管）局交波叻」。咦！呢句有啲可圈可點喎，事關公立醫院唔單止床位爆，醫護人員短缺亦做到爆，醫管局備受批評，呢位網民係咪暗嘲醫管局冇辦法紓緩問題？咁就不得而知嘞！