中環出更：在囚邵家臻難兼顧 連退三個委員會
立法會社福界議員邵家臻早前因違法佔領行動而被判囚八個月，依家佢雖然喺赤柱監獄服刑，但係議員辦事處就繼續運作。最近邵家臻就退出咗幾個委員會，而佢之前亦多次申請去立法會外開會被拒，唔通因為咁而兼顧唔到，所以要退會？
三次申外出返立會被拒
邵家臻喺上周四分別去信《二○一九年吸煙（公眾衞生）（修訂）條例草案》委員會主席郭偉強，同埋支援癌症病患者事宜小組委員會主席蔣麗芸，喺尋日就去信《二○一八年歧視法例（雜項修訂）條例草案》委員會主席麥美娟，話因為議會工作有所調整，所以決定退出三個委員會。
雖然邵家臻依家身在獄中，但佢嘅議員辦事處都仲會以佢嘅名義，喺立法會提出書面質詢。而喺較早前佢甚至提出口頭質詢，不過最後因為懲教署拒絕咗有關到立法會出席會議嘅申請，所以最後由其他議員代為發問。
邵家臻自入獄以嚟，一直都希望可以喺還押期間返立法會開會，履行其職責，先後三次向懲教署提出申請，但都被拒絕，而最近短短五日內，佢就先後退出三個委員會，係咪意味着會放棄申請返立法會開會呢？
卓妮