中環出更：胡楚南夫婦慶金婚 相處之道拗撬時認輸
談一場戀愛，可能只係需要喺對嘅時間遇到對嘅人，但相愛總是簡單，相處太難，要維持一段婚姻，比起談戀愛困難得多。做珠寶生意嘅中西區區議會前主席胡楚南同太太胡莊淑蘭近日慶祝金婚，結婚五十年，聽落真係唔簡單。問起胡楚南同太太嘅相處之道，佢就話，有拗撬時最緊要記得冇話一定要贏，認輸就得嘞，退一步海闊天空。
胡楚南喺夜校認識太太，驚為天人，那些年坐前後座鬧交結緣，佢仲寫信約會太太，形容甜蜜嘅回憶，結婚時「三無」，無樓無車無股票，太太嫁畀佢時，佢壓力好大，當年唔敢使錢，淨係訂咗四圍酒，今次結婚五十周年就擺咗十幾圍，當晚覺得仲開心過結婚。講起相處，佢話以前啲人話要大男人主義，但呢個時代已經唔同嘞，自己喺屋企都係小男人，仔女都係交畀太太。
囡囡都由美國回港支持
金婚咁難得，仔女齊齊支持啦，佢嘅女兒Salina同丈夫當晚都特別由美國回港出席，Salina話同丈夫係朋友介紹下認識，依家結咗婚十五年，講起夫婦相處，佢話最緊要唔好「死撐」，互相遷就，有乜嘢拗撬，瞓覺之前一定要解決，嬲住瞓覺大家都唔好，笑指通常都係丈夫讓步先。
當晚仲有唔少嘉賓雙雙對對咁現身恭賀胡楚南夫婦，包括保良局前主席鄭錦鐘同太太就齊齊撐場，二人結婚都超過四十年啦，鄭太話四十年好容易過。鄭錦鐘話夫婦之間相處，永遠都有小問題，如果有事睇唔過眼，只要心態唔係咁，乜嘢事都OK啦，仲笑指有爭執出現，通常都係因為自己鬧太太先，鬧到太太忍唔住，一反抗，自己就即刻收聲。睇佢笑得咁開心，二人平日一定成日耍花槍！
卓妮