政情：收料站：財會大塞車焗加會 議員八月先放暑假
立法會一年大概開三十次大會，平日就有大大小小不同嘅委員會審議事項，但時間有限兼且經常有議員「拉布」，搞到待議事項大塞車。尋日財務委員會秘書就發通告，以大包圍式諮詢議員下月有乜嘢日子得閒加會，睇嚟議員開OT已經係事在必行！
增六時段大包圍夾日子
根據文件，財委會秘書早喺四月底已諮詢議員要加會，並提供多個時段選擇，唔知係咪驚夾唔到日期，秘書最新額外提供多六個時段，由下月八日至二十日大包圍咁畀議員揀，總有幾日可以騰時間開會。相信只要夠過半人願意出席，財委會主席陳健波定會把握機會加會審議，審得幾多得幾多，免得積落下個立法年度。
大會本來喺下月中就開始休會，據悉大部分議員已為加會做好準備，月底前都唔會離港，睇怕都要八月先可以真正放暑假嘞！