政情：任監警會主席遇7‧1 郭琳廣遲赴愛女畢業禮
監警會為慶祝成立十周年，尋日喺香港大學舉辦研討會研究未來發展方向，幾位前任主席都有出席。其中由一四年到一八年出任監警會主席嘅郭琳廣喺分享嘅時候提到，唔少人形容佢嘅任期非常刺激，但對佢嚟講更似係入咗「熱廚房」。
四年任期壓力大 似入熱廚房
郭提到自己喺一四年六月一日正式上任，隨即就要迎接七一遊行，根據當時傳媒報道有五十萬人參加，當日監警會由中午起喺現場視察咗超過十二個鐘，更加令原定飛去英國參加囡囡畢業禮嘅佢要延遲起行。
七一後大約兩個月就爆發佔中，佢話當時監警會上下都面對難以承受嘅壓力，甚至半夜都收到投訴電話，監警會喺佔中期間收到有史以來最多投訴，甚至有組織話明知監警會當時都做唔到啲乜嘢，但照樣投訴嚟向警方同政府施壓。佢又提到當時有委員打算辭職，以示唔同意警方施放催淚彈，佢就向嗰名委員解釋辭職都於事無補，仲會令監警會情況變得更差，最後要出盡全力去說服，幾乎要跪地請求，嗰位委員先無辭職。