政情:修逃犯例指指點點 肥彭又回魂搞搞震

正所謂「不在其位,不謀其政」,但香港回歸近二十二年,每逢出現大事,末代港督彭定康(肥彭)依舊陰魂不散,好似近來社會討論得如火如荼嘅修訂《逃犯條例》,肥彭就拍片發聲明,喺一個月內兩度「回魂」喺度指指點點,公開要求港府撤回方案。佢今次仲重提出任港督時做過嘅嘢添,立法會前議員王國興強烈譴責肥彭兩次喺度搞搞震,揶揄佢「炒冷飯」重提往事只因自卑心重,心知肚明冇人會再理佢囉!

稱危害港金融地位 對政府感驚訝

肥彭喺上月底先接受傳媒訪問講修例,近日就拍片發聲明,以為佢啲理據有幾咁驚天地、泣鬼神,實情咪又係老調重提。同上月底嘅訪問一樣,肥彭只係喺度「數白欖」,包括話修例就係移除香港同內地嘅「防火牆」,會危害香港作為國際貿易中心嘅地位,又話會影響經濟穩定、法治同安全等,對於港府唔理解會有咁大影響感到「驚訝」,不斷重複指中央近年加強控制香港,打擊異見人士等。

最離譜係肥彭居然重提出任港督時嘅事迹,話當年經常去華盛頓游說,要求美國唔好將香港同深圳、上海等城市混為一談,強調香港嘅商業同經濟必須要同中國分開,重申認為修例唔應該出現。

再提任港督往事 政界指自卑心重

對於肥彭又對香港事務指指點點,王國興強烈譴責肥彭兩次喺度搞搞震,理據全部都係陳腔濫調,猶如同反對派「大合唱」,反修例嘅理由都係毫無根據兼一式一樣,實際只係為咗鼓吹市民上街。佢強調修例係保護普羅大眾,唔明點解一位做咗咁多年行政工作嘅前港督可以亂咁嚟,唔支持保護市民嘅修例,係咪想保護罪犯?佢又揶揄肥彭「炒冷飯」,重提往事顯得自卑心重,明顯知道已經冇人會再理佢先搵嘢講,明言冇人記得肥彭在位做過有乜嘢好事,只知佢被批評係千古罪人,再向美國賣口乖都冇意思。

老實講,一位過氣咗廿幾年嘅前港督,仲不停咁就香港事務噏三噏四,相信唔少人都同樣會感到「驚訝」。既然早已還鄉,肥彭就應忘卻前塵往事,重提當年所謂嘅「功績」,擺明係刷存在感,搞事又搗亂喇!

第一手消息請下載on.cc東網iPhone/iPad/Android/Windows Phone Apps