中環出更：立會內曾被推跌 麥美娟睇片操肌
依家網絡世界嘅資訊多籮籮，唔少人都會透過睇短片學吓煮飯又或者係做運動，立法會議員麥美娟（Alice）都唔例外，最近仲睇片做肌肉訓練添！早排Alice喺立法會曾經被推跌受傷，唔通依家秘密操練，想喺下次立法會爆混亂時紮穩個馬步？
自爆好少做運動
Alice尋日喺立法會上發言時自爆，話最近睇緊一條嚟自新加坡有關「Stand for strength」嘅短片，內容係要人先坐喺度翹埋手，再以單腳企起身。佢話睇落好似好容易，但係最初自己都做唔到，先發覺需要做運動，結果用咗兩個星期去密密做運動，依家就開始做到喇！
之後Alice接受查詢時就話，上個月喺立法會被推跌後，有醫生朋友就傳咗呢段片畀佢，建議佢做吓運動。佢話有做開健身嘅朋友，一睇完段片就做到個動作，而自己本身好少做運動，依家睇完段片之後就會做吓拉筋，同埋柔軟體操咁，佢仲建議上咗年紀嘅人應該要做多啲運動，強化吓肌肉，避免關節有損傷。
卓妮