中環出更：鄧明慧消暑秘方着裙煲冬瓜湯
呢幾日天氣炎熱，日間最高氣溫高逾攝氏三十度，行出街真係有熱到就快溶嘅感覺。東華三院副主席鄧明慧（Mandy）被問到有乜嘢解暑方法，佢就話消暑良方就係從衣着入手。即係點？原來就係着裙喇！
Mandy日前出席一個家電品牌活動時話，作為女士嘅好處係喺炎炎夏日外出時可以唔使打呔，如果着裙、唔使焗住對腳就更加涼快，而佢亦都會煲吓冬瓜湯畀屋企人飲，幫屋企人解暑。雖然夏天家家戶戶都會開冷氣，不過佢就話平時屋企如果要開冷氣，就會開喺大廳嗰部，屋企人就會聚埋喺個廳活動，以免廳同睡房都開冷氣，嘥電又唔環保。而為咗環保，佢平時都會避免用膠袋，出街用膳時如食唔晒啲嘢，都會用餐盒帶走，減少浪費咁話。
張宇人自言環保 好少用紙巾
講起環保，立法會飲食界議員張宇人就自言好環保。佢話天氣熱時，如果太太去咗旅行，佢都唔使開冷氣o架，因為一個麻甩佬喺屋企，淨係着條短褲就得，咁樣已經涼浸浸喇，而佢咁多年來都有用手巾仔，好少用紙巾嘅，仲豪言要同環境局官員鬥交得少電費，直言「拎十年電費單出嚟，睇吓邊個環保啲！」唔通佢唔記得咗環境局局長黃錦星曾經公開過自己屋企嗰張零電費單據？
同場仲有東華三院主席蔡榮星、副主席馬清揚同港九電器商聯會永遠榮譽主席朱嘉樂。蔡就話天氣太熱始終都要開冷氣，但佢就會避免「日開夜開」，覺得其實打開啲窗等空氣可以對流，都可以令室內降溫，反而如果成間屋關密門窗焗住晒，仲容易患感冒咁話。而朱就話隨着科技發展，依家已經有變頻式冷氣機，比過往傳統冷氣機慳電，所以就算開冷氣，都唔使驚唔環保咁話。
卓妮