政情：李劉素英：男士都可以係家暴受害人

礙於自尊 唔輕易求助

李劉素英話，大多數人都以為家暴就係指受虐人遭到肉體傷害，其實語言侮辱、精神傷害同經濟封鎖都可以視作家暴行為。佢又話，雖然其機構收到嘅求助個案當中，男性受害人只佔一成六，但相信遭到伴侶施虐嘅男士應該唔止呢個數，因為男士會礙於強烈嘅自尊，唔輕易向第三方尋求協助。佢又話，當男士主動求助時，可能會因男強女弱嘅社會成見被質疑遭遇是否屬實，導致受虐男士寧願選擇啞忍。

李劉素英話，佢見過有人默然承受配偶嘅苛待，直至兒女成家立室，先至毅然提出離婚。為打開男士嘅心房，佢會選擇用「商量解決方法」以取代「求助」嘅字眼，又或者一齊去打波、行山，等建立信任之後，對方就會願意盡訴心中情喇。