政情：黃容根涉官地違泊 「我有交車位租金」
新界鄉郊地方最多嘅投訴唔係僭建就係霸地，就連前立法會議員黃容根早幾日都被人投訴佢喺大埔林村霸佔官地泊車。黃接受查詢時承認其中一部車係佢擁有，另一部就冇講車主係邊個，只係話好快會駛走，佢又解釋冇考究過有關地段係咪官地，自從二○○三年搬入村以後，就一直泊喺嗰度，仲話業主講明可以泊車，佢亦都有交車位租金。
稱車場冇明確劃線
黃又話，其實車場並無明確劃線，附近居民咁多年都係咁泊，主要都係互相遷就，從來都冇人投訴，亦冇起過衝突，仲話早前渠務署仲嚟過修渠，一度觸動車場部分位置，但修渠後都有還原，畀番居民泊車，反問如果有關地段屬官地，點解當時政府冇圍封，仲繼續畀居民用呢？
至於今次被投訴，黃話對方事前都有同佢傾過，只同對方講「如果你要投訴就投啦」，直言若果係官地就拖走部車。黃覺得彼此係隔籬鄰舍，應該多啲互相遷就、互相幫忙喎。