政情：鍾意食糉 顏汶羽自嘲飯桶
端午節將至，觀塘區議員顏汶羽（Frankie）就諗起媽媽以前蒸鹹肉糉畀佢做午餐，佢仲自嘲係「飯桶」，最鍾意食飯，所以都好鍾意食糉喎。不過佢已經好多年冇自己蒸糉食喇，事關佢依家好少喺屋企煮飯，工時又長，冇乜時間精力入廚蒸糉，所以最多都係出席活動時食一兩啖咋。
鹹蛋黃留番最後食
Frankie話佢好鍾意食鹹肉糉，當中嘅鹹蛋黃更加係佢嘅至愛，細個嘅時候媽媽會蒸鹹肉糉畀佢做午餐，仲會加糖喺面，有啲甜味，不過最重要都係食嘅次序，最珍貴嘅鹹蛋黃一定係留番最後一啖先食咁話。
Frankie又話，冇同父母住之後媽媽都冇再蒸糉畀佢食，慨嘆做議員大時大節都要落區，如父親節同母親節咁，都要同街坊慶祝，反而冇得同自己父母食飯，好彩佢媽媽有時都會陪佢落區，所以見得多啲，爸爸同其他親戚有時都會投訴要透過電視報章先見到佢。睇嚟佢真係要花多啲時間陪屋企人喇。