中環出更：逃犯例風波市民寄聖誕卡叫何君堯企「好的那邊」

立法會議員不時都會收到市民來信，議員何君堯尋日就收到市民嘅聖誕賀卡。不過依家先至係六月，而聖誕節就係十二月。究竟呢張卡係遲咗半年收到定早咗半年收到，就真係寄嗰位先知喇。而該位市民仲喺賀卡中寫到近日政府擬修訂《逃犯條例》，話希望何喺修例一事上要喺「好的那邊」咁話。

何君堯尋日喺社交網站上分享佢收到嘅一張由一名姓鄭嘅市民送嘅聖誕卡，卡入面談到近期社會上爭論不絕嘅《逃犯條例》修訂。呢位市民認為，條例如何修改存在着「如土星光環一樣巨大的灰色地帶」，但相信結果係會由「好的政治行動」決定，不過呢位市民就話唔識分點先叫好，只希望何都會喺「好的那邊」。

何君堯就親自寫信回覆呢位「鄭先生」，先大讚聖誕卡好有意思，又大談佢對修例嘅睇法，認為不論政治上或法律上都必須通過，而修例只係針對逃犯，相信鄭先生唔會受到干擾，又話相信鄭先生都係愛國，叫對方毋須過分擔心。何更喺下款自稱係「你好的那邊」添。唔知何認為嘅「好的那邊」同鄭先生所諗嘅係咪相同呢？

卓妮

中環出更：逃犯例風波 市民寄聖誕卡 叫何君堯企「好的那邊」