中環出更：想減走「蝴蝶袖」 植潔鈴恨扒龍舟
端午節係春夏之交，游完龍舟水，背心短褲終於可以隆重登場。日前喺一個龍舟競賽活動上，見到唔少血氣方剛嘅男士出盡力扒龍舟，岸上則有一位小粉絲睇得十分興奮，佢就係東區區議員植潔鈴（Elaine）。不過，Elaine就嘆唔太熟水性，有得睇無得扒，仲自爆想落水皆因聽聞可以減去一對「蝴蝶袖」喎！
Elaine笑言，有大學莊員平時玩開龍舟，同佢講扒龍舟可以減去一對喺陽光下飛舞嘅ByeBye肉，令佢即刻心動想落水。但佢平時只可以喺腳掂到地嘅水位游水，一掂唔到地就會無安全感覺得驚，有漁民會嘅兄弟都唔敢畀佢落水，反建議着救生衣做打鼓位，但咁樣睇落唔夠型，佢就唔肯去喇。始終係後生女，偶像包袱真係大。
細個溺水 張國鈞唔熟水性
同場嘅立法會議員張國鈞（Horace）就理直氣壯話，喺陸地上所有運動佢都識玩，但一落水就不行了，強調自己唔係唔識游水，只係小時候喺沙灘溺水，爸爸下「禁水令」，令佢依家變咗無咁熟水性，少玩水上活動啫。但Horace轉頭又靜靜雞講，一對寶貝女至今仲未知佢唔識游水添o架。
活動舉辦方柴灣漁民娛樂會主席黃根仔，六歲已經開始扒龍舟，慨嘆近年已經唔同晒。佢憶述以前一班漁民子女邊有時間練習，到端午節一落水就扒，笑言當年大家最好係氣力，唔係默契，但都扒得快。佢又講起傳統漁民會半夜拜神，要含住粒糖唔准出聲，送龍舟落水，依家就再冇咁嘅儀式喇，直言諗起當年都幾懷念喎。
卓妮