早前發表嘅審計報告炮轟運輸署任由「死車」停泊喺政府停車場唔拖走，累庫房少收三百四十萬元，運輸署署長陳美寶尋日喺立法會政府帳目委員會會議中認衰，承認監管承辦商不力，仲話會針對「死車」問題，要求承辦商提交報告。話時話，財爺陳茂波喺庫房水浸下，對市民仍然撳實荷包唔放水，但班政府官員就係咁嘥公帑，試問點對得住納稅人，最弊嘅係班官淨係識得踢一腳先郁一下，咁嘅官場陋習幾時先糾正到。
