政情：譚文豪跑慢半秒 趕唔切投票
立法會議員幾乎日日都要投票，但唔會長期留喺會議室裏面，好多時係知道要投票時先會趕返入去，好似財務委員會尋日審議代二○年香港中學文憑試學生繳交考試費時，有議員提出臨時動議，就響鐘五分鐘召集議員返嚟，其中譚文豪（Jeremy）就因為遲咗，盡力跑都慢咗半秒，結果佢只係撳到出席鍵，未撳到支持定反對，仲畀其他議員恥笑。
查實Jeremy係五分鐘鐘聲過後先進入會議室，佢都知自己遲咗，所以都係跑住入嚟，亦都有叫負責主持會議嘅財會副主席陳振英等埋佢，但陳當時正低頭處理緊其他事務，未有留意Jeremy跑緊埋位，結果投票程序繼續進行，而Jeremy就因為咁投唔切票喇！
畀其他議員恥笑
Jeremy話雖然相信陳係無心之失，但可以留意多啲有冇議員趕緊返嚟，好似佢今次咁，抬頭望下，畀多幾秒佢就夠。陳有接受Jeremy嘅提醒，話下次會留意吓，不過如果Jeremy咁想投票，不如下次早多幾秒入會議室，就唔會重演尋日嘅醜態喇！