政情：律師會理事會改選 簡汝謙擸逾1700票都輸
香港律師會前晚舉行周年大會同埋理事會改選，有九名候選人角逐五個理事會席位。國際青年商會香港總會前會長簡汝謙亦有參選，但據悉雖然佢獲得逾一千七百票，但最終因排第六而落敗，未能當選做理事。同時，上年落敗嘅前理事帝理邁（Mark Daly）則重返理事會。
帝理邁失而復得
今次律師會理事會選舉競爭激烈，據了解每位參選人都分別拎咗逾一千五百票，結果帝理邁取得一千九百零二票成為票王，江玉歡、鄭偉邦、余國堅同埋爭取連任嘅湯文龍亦當選為理事。四人分別拎咗逾一千八百票，其中帝理邁同湯文龍所得嘅票數只相差一票。
律師會理事會投票分為郵寄選票、親身投票同埋授權票，喺郵寄選票同親身投票方面，據悉帝理邁同另外三位落敗嘅參選人黎壽昌、廖振璋及黃金霏都分別獲得逾一千三百票同逾一百二十票，其餘五位參選人分別只得不足六百票同不足一百票。
授權票方面，湯文龍、江玉歡、鄭偉邦、余國堅同簡汝謙就佔優，每人分別獲得逾一千二百票，而同時另外四人分別只得百零票。