政情：迷戀街頭小食 梁美芬請食煎釀三寶
香港有唔少街頭小食，而立法會議員梁美芬似乎都係愛好者，事關連續食咗三日煎釀三寶，尋日更特登買咗幾盒請人食添！
梁美芬就話一食煎釀三寶就勾起小學時代去學游水嘅情況，當時每逢落堂都會成班小朋友花幾毫子買煎釀三寶醫肚，仲話現時食嘅係回憶喇！不過，今次特別係，光顧嘅小店已經營業四十載，但敵唔過高昂舖租而結業，係最後一日開舖，佢大嘆店主堅持小食定價唔應該貴，係殷實商人，所以趁結業前連續光顧三日，又話熱氣都唔怕，因為已經係最後機會。
唔少議員經過都齊齊食，好似有議員蔣麗芸、葉劉淑儀等，佢哋對煎釀三寶嘅評價都幾正面o架，不過議員張國鈞就堅持唔食，而佢唔畀面嘅原因係畀人笑佢肚腩現形喎。