中環出更：在囚邵家臻申外出遭內會否決 建制促辭職
立法會社福界議員邵家臻因違法佔領行動（佔中案）被判入獄八個月，雖然目前仍喺赤柱監獄服刑，但佢就下周三立法會會議上提出修正案。立法會內務委員會尋日討論係咪支持邵去信懲教署，申請外出許可履行職務，結果就以二十票贊成、三十五票反對遭到否決，更有建制派議員要求邵自行辭職添！
葛珮帆：議員犯法不應享特權
議員謝偉銓話邵家臻刑期已超過一個月嘅門檻，立法會理應通過議案解除其職務，但泛民鍾意護短，亦估計因議會近期事務繁多先未提出。佢重申無議員代表業界情況唔理想，建議邵家臻考慮自行辭職，畀政府盡快進行補選，搵人履行議員職務。議員葛珮帆就話立法會議員犯法入獄唔應該享特權，而懲教署功能係懲與教，畀違法人士反省同悔過；議員何啟明強調懲教署有專業判斷，以內會名義去信懲教署有施壓之嫌囉。
泛民議員當然支持去信喇，不過議員區諾軒就噏錯，話以前有時任立法會議員入獄，都有考慮提出外出許可，但就錯稱該名前議員係李國寶，查實應該係詹培忠。
另外，議員莫乃光同葉建源尋日去壁屋監獄探望正在服刑、佔中發起人之一嘅陳健民，形容已習慣獄中生活，精神飽滿，而賺到工錢後已經買咗「白飯魚」，可以做運動。
卓妮