中環出更：食麥皮降膽固醇 徐汶緯保持健康標準
要減肥、降膽固醇真係無捷徑，做運動同食得健康啲就係真理嘞！不過，健康食品都通常都冇肥膩嘢咁好味，好似稻苗學會主席徐汶緯早前出席一個有關健康煮食嘅活動時就講起，自己早排驗到膽固醇超標，要每朝做一小時帶氧運動同食麥皮餐，形容食麥皮餐期間「世界得番黑同白」添呀！
徐汶緯話以前覺得自己好後生，梅菜扣肉嗰啲都係食咗至算，每朝早餐仲鍾意食牛肉公仔麵，搞到膽固醇超晒標，要三個多月先降至安全水平，之後佢覺得夠嘞，唔再食麥皮嘞，但盡量都會保持住，唔好食得咁唔健康，早餐轉食牛肉米粉，其餘時間喺落筷前，都會「停一停，諗一諗」之後先放入口，亦都因而好了解客人對健康同口味嘅取捨，希望客人覺得食品好味之餘，又令佢哋食得健康啲。
黃家和推少甜奶茶好賣得
講起健康食品，外界覺得秋葵、苦瓜都好健康，但好多小朋友都唔鍾意食，稻苗學會會長黃傑龍就教路，苦瓜出得水多就無益，亦可以喺煮嗰陣落糖同話梅，雪凍佢當冷盤咁整，咁就會好好味o架嘞！佢話落話梅粉或一粒粒話梅都得，而靚話梅就梗係好食啲啦，不過糖分鹽分都會高咗，都係取捨，唔好落得太多，稍為中和吓。
同場嘅香港餐飲聯業協會會長黃家和就講起，其實近年苦瓜品種有啲改良，唔係咁苦，加上有啲煮法都可以去咗啲苦澀味，咁就會易入口啲啦！佢本身係奶茶專家，咁飲奶茶有冇得健康啲呢？佢就話有出少甜奶茶，卡路里低約三成，相當好賣o架，依家啲人嘅口味有改變，鍾意冇咁甜嘅食品咁話。
卓妮