政情：質素差 收視低 港台開位再捱批

港台千瘡百孔已經係不爭嘅事實，好似舊年嘅審計報告就大彈港台收視低、成本高、不斷重播、營運表現欠佳等，而今次要開設嘅職位其一職責就要跟進審計報告嘅建議，所以會議又重提港台被審計署狂插嘅醜事，好似本身為帳委會委員嘅邵家輝大嘆，帳委會就點樣處置港台問題仲未有定案，足證問題有幾咁複雜。佢續指，港台要有更好收視同埋好節目，做出好成績就唔使再諗點樣節流，立法會更會批出更多撥款，港台更可以愈做愈大咁話。

葉劉斥不應學商界嬉笑怒罵

委員會主席葉劉淑儀就指學校播放教育電視次數下跌，相反製作成本好高，過去十年嘅每個鐘頭製作成本上升幅度超過一倍，認為從衡工量值嘅角度去睇，應要同教育局商討係咪保留教育電視。佢亦話港台為政府部門要注意成本同收視率，但唔應該好似商界咁用嬉笑怒罵、掟水球等爭取娛樂性質同收視，強調港台有社會責任同遵守電台約章，反問仲記唔記得以往有電台搞貓頭鷹節目，搵幾個靚女拎杯酒，直指港台唔應該咁做。

上次會議已有議員借機批評港台節目，不滿長時間播住烏龜而無解說。而尋日再有議員批評呢類節目，今次更出自泛民把口，大話港台為滿足播放時間，播放由東京去大阪嘅新幹線行駛情況，無聊時都會睇當去咗日本都好，但呢類節目實際係攝時間，而港台節目亦都一雞兩味，錄音同時拍片當電視節目，而上述代表港台資源唔夠，再加位去督導資源調配只會令港台情況更差喎。

通過加設廣播副處長常額位

不過，商務及經濟發展局常任秘書長梁卓文就話，港台人手喺過去九年增加近倍，支出增至每年十億港元，否認資源濕碎同雞碎咁多。會議最終通過港台加位申請，將交畀財務委員會審議，亦通過支持勞工處開設首席勞工事務主任，以及勞工及福利局開設丙級政務官職位。