中環出更：吳國安遊孟加拉孭袋入廟防偷鞋
早前都講過，香港中華廠商聯合會（廠商會）永遠名譽會長李秀恒曾到孟加拉拍攝當地慶典，順道探訪喺當地設廠嘅會董張壽文，兩人參觀清真寺後，發現放喺寺外嘅鞋被偷，認真尷尬，而日前廠商會亦組團到當地考察，為免重蹈覆轍，諗咗條好橋防偷鞋喎。
因為治安問題，張壽文已經搵咗個揸槍嘅保鏢傍實李秀恒，話說今次廠商會考察團亦參觀咗保良局前主席顏寶鈴喺當地開設嘅帽廠，亦都有遊覽當地名勝。副會長吳國安話為確保團友安全，全程有三名當地警員傍實，而去參觀印度廟時，大家就將對鞋放入環保袋，孭住個袋入廟，咁就萬無一失嘞！
吳國安話當地冇乜娛樂，不過有一晚安排咗遊河，仲同時食烤羊肉。嘩！聽落好似好正咁喎。但佢話嗰晚突然好多蒼蠅同蚊，一群群咁飛過嚟，佢同廠商會行政總裁楊立門喺度不停咁拍蒼蠅，楊立門就話因為嗰晚又熱又冇燈，烤肉又招惹晒啲蚊同蒼蠅嚟，惟有不停咁拍，真係好慘。
陳淑鈴都喺當地設製衣廠
針對今次考察，會長吳宏斌話當地出口去其他地方嘅貨物係零關稅，再加上內地生產成本愈嚟愈高，搵工人又難，相對孟加拉勞動力充足，人工較低，對廠家有吸引力，正如顏寶鈴間帽廠係大規模同已經引進先進機械，且愈做愈好，而常務會董陳淑鈴都係當地開咗製衣廠嘞！不過，佢就發覺當地經常塞車，若果要提升經濟效益，當地必須加快改善交通擠塞嘅問題，否則對物流亦影響好大。
楊立門亦話，由於中美貿易摩擦，甚至可能加關稅，好多以美國為市場嘅廠家都要搵出路，必須搵啲人口密集而又低成本嘅地區去設廠，廠商會舊年都去考察咗埃塞俄比亞，希望可以令港商了解多啲，亦搵多啲出路。
卓妮